Qeveria e Meksikës ka arrestuar një trafikant të dyshuar droge, pjesë e listës “të më të kërkuarve” të Bashkimit Europian. Ai është Janos Balla, një shtetas hungarez, i cili përdor pseudonimin “Daniel Takacs”.
Janos Balla është arrestuar në shtetin jugor të Quintana Roo, në Meksikë, dhe ishte një nga personat e kërkuar nga Interpoli për shpërndarje të narkotikëve dhe substancave psikotrope. Në një deklaratë të Ministrit të Sigurisë të Meksikës, Omar Garcia Harfuch, thuhet se ky person ishte dënuar me gjashtë vjet burgim në Bashkimin Europian dhe kishte një urdhër ndalimi ndërkombëtar nga Interpoli.
Përmes një operacioni të koordinuar nga agjencitë e sigurisë të Meksikës dhe Hungarisë, u mundësua lokalizimi dhe arrestimi i tij në një rrugë të njohur të qytetit Benito Juarez, në Playa del Carmen. Pas arrestimit, ai është dërguar tek Instituti Kombëtar i Migracionit të Meksikës, ku do të shqyrtohet statusi i tij migrator dhe do të nisë procesi i deportimit drejt Evropës.
Ky arrestim është pjesë e një strategjie më të gjerë të qeverisë së presidentes Claudia Sheinbaum, e cila ka vendosur të ndjekë një qasje më të ashpër kundër trafikantëve të drogës dhe grupeve të krimit të organizuar. Sheinbaum ka distancuar veten nga politika e “përqafimeve dhe jo e plumbave” të paraardhësit të saj, Andres Manuel Lopez Obrador dhe ka shpallur një fushatë të re me përpjekje të përbashkëta me Shtetet e Bashkuara, për të luftuar kartelët.
Presidenti i SHBA-ve, Donald Trump, ka kritikuar disa herë kartelët në Meksikë, duke kërkuar masa më të ashpra. Në përgjigje, qeveria e Sheinbaum ka theksuar se ka pasur një rritje të ndjeshme të arrestimeve të kriminelëve të profilit të lartë, siç ishte rasti i liderit të kartelit Jalisco New Generation, El Mencho, që u vra në shkurt.
Në kuadër të masave të sigurisë për evente të tilla si Kupa e Botës 2026, Sheinbaum ka deklaruar se do të dërgohen deri në 100,000 punonjës sigurie nëpër rrugët e Meksikës për të garantuar rendin dhe sigurinë gjatë eventit sportiv.
Edhe pse ka pasur kritika për dërgimin e anëtarëve të kartelëve në SHBA pa urdhra ekstradimi, qeveria meksikane mbron këto veprime, duke thënë se janë të nevojshme për sigurinë kombëtare dhe janë realizuar me respekt për sovranitetin e Meksikës.
