Një 29-vjeçar shqiptar i shpallur në kërkim ndërkombëtar është arrestuar në Belgjikë në kuadër të operacionit “Ndërveprimi”.
Strukturat e FAST Albania, nëpërmjet rrjetit ENFAST, kanë dhënë kontribut në lokalizimin e shtetasit Nasi Hodo, 29 vjeç, i lindur në Sarandë, i cili fshihej në Belgjikë.
29-vjeçari ishte dënuar në vitin 2019 nga Gjykata e Vlorës me 18 vite burgim për veprat penale “Vrasja me dashje”, kryer në bashkëpunim, “Vrasja me dashje”, mbetur në tentativë, si dhe “Plagosja e lehtë me dashje”.
Ngjarja për të cilën ai është dënuar është regjistruar në korrik të vitit 2017, në fshatin Borsh, Sarandë, ku në bashkëpunim me dy shtetas të tjerë, ka vrarë me mjet prerës (thikë) shtetasin P. B. dhe ka plagosur rëndë shtetasin E. M., pas një konflikti për motive të dobëta. Gjithashtu, ai akuzohet edhe për plagosjen e një shtetasi tjetër, D. K.
Aktualisht, vijon bashkëpunimi ndërmjet Interpol Tiranës dhe autoriteteve belge për përfundimin e procedurave të ekstradimit drejt Shqipërisë, ku 29-vjeçari do të vuajë pjesën e mbetur të dënimit prej 13 vjetësh, 6 muajsh dhe 27 ditësh burgim.
