BBC do të shkurtojë deri në 2,000 vende pune në një nga ristrukturimet më të mëdha për transmetuesin publik britanik në një dekadë. Punonjësve iu bë e ditur për ndryshimet në një takim të përgjithshëm të stafit të mërkurën, me shkurtimet që prekin rreth 10% të 21,500 stafit të organizatës. Shkurtimet vijnë përpara emërimit të ish-ekzekutivit të Google, Matt Brittin, si drejtor ekzekutiv muajin e ardhshëm. Janë shkurtimet më të mëdha të vendeve të punës që nga viti 2011.
Në shkurt, BBC njoftoi një plan për uljen e kostove prej 600 milionë paundësh, duke paralajmëruar se kjo do të çonte në humbje vendesh pune dhe shkurtime programesh.
Drejtori i përgjithshëm në largim, Tim Davey, tha në atë kohë se organizata do të duhej të ulte kostot e saj vjetore operative, të cilat janë rreth 6 miliardë paund, me 10% gjatë tre viteve të ardhshme. Davey u largua nga BBC më 2 prill, pasi njoftoi dorëheqjen e tij në nëntor pas një reagimi të ashpër ndaj mbulimit të çështjeve që përfshinin Donald Trump, Gazën dhe të drejtat transgjinore.
Drejtori i përkohshëm i përgjithshëm Rhodri Talfan Davies, i cili po drejton takimin e përgjithshëm të stafit, do të mbetet në krye deri në mbërritjen e Britten më 18 maj.
BBC është gjithashtu në bisedime me qeverinë për të rinovuar kartën e saj mbretërore, e cila skadon në fund të vitit të ardhshëm, duke përfshirë mekanizmin e saj të financimit përmes tarifës së licencës.
Tarifa e licencës u rrit më 1 prill, në përputhje me inflacionin, nga 174.50 £ në 180 £ në vit. BBC mblodhi 3.8 miliardë £ nga kjo tarifë vitin e kaluar nga 23.8 milionë familje, me 2 miliardë £ të tjera që vijnë nga aktivitetet tregtare dhe grantet.
Megjithatë, numri i familjeve që paguajnë tarifën e licencës ka rënë me 300,000 nga viti në vit, ndërsa shmangia e pagesave rritet dhe më shumë shikues kalojnë ekskluzivisht në platforma dixhitale konkurruese si Netflix dhe Disney.
