Joan Laporta reagoi ashpër pas eliminimit të Barcelonës nga Atletico Madrid në çerekfinalet e Champions League, duke e cilësuar arbitrimin në të dyja ndeshjet si skandaloz dhe të dëmshëm për klubin katalanas.
Presidenti i Barcelonës, i cili të mërkurën ishte i pranishëm në Real Club de Tenis Barcelona, fillimisht përgëzoi Atletico Madrid për kualifikimin, por menjëherë më pas shpërtheu ndaj vendimeve të arbitrave dhe VAR-it.
“Arbitrimi, si nga arbitri ashtu edhe nga VAR-i, ishte një turp. Ajo që na bënë është e patolerueshme”, deklaroi Laporta para mediave.
Ai u ndal fillimisht te ndeshja e parë, duke pretenduar se Barcelonës nuk iu akordua një penallti e qartë dhe se një prej lojtarëve të saj u ndëshkua padrejtësisht me karton të kuq, në një rast që sipas tij duhej të ishte vetëm karton i verdhë.
Sa i përket ndeshjes së kthimit në Metropolitano, Laporta kundërshtoi edhe më fort disa vendime, duke thënë se ndërhyrja ndaj Eric nuk ishte për karton të kuq sepse Kounde mund të kishte mbërritur te topi. Ai kritikoi gjithashtu ndërhyrjen e VAR-it ndaj arbitrit kryesor Turpin.
Sipas tij, goli i Ferran Torres ishte i rregullt, ndërhyrja ndaj Dani Olmo ishte penallti, ndërsa episodi ndaj Fermin ishte i papranueshëm, pasi lojtari mbeti me buzën e çarë dhe kundërshtari nuk u ndëshkua as me karton.
Laporta bëri të ditur se Barcelona do të paraqesë një tjetër ankesë në UEFA, edhe pse ankesa e parë pas ndeshjes së parë ishte shpallur e papranueshme.
“Ne bëmë një ankesë dhe tani po kërkojmë shpjegime pse ajo ankesë u konsiderua e papranueshme. Do të paraqesim një tjetër, sepse ajo që na bënë përsëri është e papranueshme. Janë vendime shumë të dëmshme për interesat e Barcelonës”, u shpreh ai.
Në fund, Laporta sulmoi edhe ata që pretendojnë se arbitrat favorizojnë Barcelonën, duke i quajtur “të paturpshëm”.
“Ata që mendojnë se arbitrat favorizojnë Barçën janë të paturpshëm. Mjafton të shohin këtë përballje të Champions League. Askush nuk e beson këtë”, deklaroi kreu i klubit katalanas.
