Është zbardhur dëshmia e këngëtarit, Ademir Fresku, i cili u godit me thikë nga tregtari i fruta-perimeve, Gjergj Dardha.
30-vjeçari ka deklaruar se Gjergji Dardha e ka goditur me thikë pas shpine dhe sulmi ndodhi në pabesi.
Ai u shpreh se autori besdiste punonjësit e lokalit në pronësi të tij, duke shtuar se i kërkoi disa herë që të mos shkonte më aty.
Këngëtari deklaroi se në spital shkoi vetë me makinë për të marrë ndihmë mjekësore.
“Nuk doja të isha pjesë e këtyre gjërave. Është bërë më e madh se ç’duhet. Jam goditur pas shpine por shpresoj që gjithçka të zgjidhet nga shteti.
Me autorin njiheshim, mundohesha t’i njihesha e ti respektoja të tërë. E kam takuar 3-4 herë. I ka bezdisur disa herë punonjësit e lokalit tim, por nuk i kam hyrë shumë në detaje.
I kisha thënë në mënyrën më qytetare të mundshme që të mos vinte më në lokalin tim.
Familjarët e autorit nuk më kanë kontaktuar. Unë kam 4-5 plagë me thikë në trup. Ka qenë një sulm në pabesi, nuk e kam vënë re.
Në spital shkova vetë, mora makinën dhe shkova të merrja ndihmën mjekësore sepse nuk e dija se çfarë kisha pësuar saktësisht”, tha ai.
