Policia e Tiranë ka finalizuar operacionin e koduar “Hijet”, duke zbardhur një rast të rëndë rrëmbimi dhe dhune fizike ndaj një 32-vjeçari.
Sipas hetimeve, tre persona e kanë marrë me forcë të riun dhe e kanë mbajtur për disa orë në një ambient në Xhafzotaj, ku e kanë kanosur dhe dhunuar për t’i marrë një shumë parash.
Në kuadër të operacionit janë arrestuar dy autorët e dyshuar, shtetasit Hysen Neza (33 vjeç) dhe Kevin Neza (25 vjeç), ndërsa një tjetër, J. N. (28 vjeç), është shpallur në kërkim.
Gjatë aksionit, policia ka sekuestruar 5 automjete, 5 telefona celularë, një shumë parash dhe sende të kundërligjshme.
Operacioni u zhvillua nga Sektori për Hetimin e Krimeve të Rënda, në bashkëpunim me Forcën Operacionale dhe Forcën e Posaçme “Shqiponja”, pas kallëzimit të bërë nga i dëmtuari.
Ndërkohë, vijon puna për kapjen e personit të shpallur në kërkim dhe për dokumentimin e plotë ligjor të ngjarjes.
