Robert Lewandowski mund të jetë pranë një aventure të re në karrierë. Sipas raportimeve, sulmuesi polak i Barcelonës i ka ofruar shërbimet e tij Milanit, duke hapur kështu mundësinë për një transferim të bujshëm në Serie A.
Raportohet se gjatë kësaj jave përfaqësues të Milanit dhe agjentët e Lewandowski kanë zhvilluar një takim për të diskutuar detajet e para të një marrëveshjeje të mundshme. Burime pranë çështjes bëjnë të ditur se 37-vjeçari është i interesuar pikërisht për një kalim te Milani, pavarësisht interesimit të madh nga klubet e MLS dhe Arabia Saudite.
Lewandowski u transferua te Barcelona në vitin 2022 nga Bayern Munich për 45 milionë euro. Që nga ajo kohë, ai ka zhvilluar 186 ndeshje me fanellën blaugrana, duke shënuar 118 gola dhe duke dhënë 23 asistime. Kontrata e tij aktuale me Barcelonën skadon në verën e këtij viti.
Sipas Transfermarkt, vlera aktuale e tij në treg vlerësohet në 8 milionë euro. Edhe pse është 37 vjeç, Lewandowski duket se nuk ka ndërmend të ngadalësojë ritmin dhe mund të jetë gati për një tjetër kapitull të madh në futbollin europian.
