Në Gjykatën Themelore të Prishtinës, po mban një konferencë për mediat nga prokurorja e rastit dhe kryeprokurori lidhur me vrasjen e Liridona Ademajt, e cila u vra më 29 nëntor 2023. I pranishëm është dhe vëllaj i të ndjerës, Leonard Ademaj.
“Për detajet e aktakuzës nuk mund të flasim. Përderisa kanë jetuar në Suedi kanë pasur marrëdhënie të çrregulluara dhe kanë pasur çështje edhe financiare. Për të gjithë emrat e të pandehurve në këtë lëndë e dimë se kush janë. Keni dëgjuar emrin e njërit që i ka planifikuar të gjitha e ai është Naim Murseli dhe nëse dëgjoni se kemi marrë të dhëna nga Suedia kemi përmendur Kushtrim Kokallën dhe Granit Plavën. Ekziston edhe një i pandehur që rastësisht është gjetur aty,” deklaroi prokuroja e çështjes.
Sakaq, Leonard Ademajt dhe familja e tij janë shprehur vazhdimisht se ata presin drejtësi për këtë ngjarje. Kujtojmë se më 29 nëntor të vitit të kaluar, Kosova dhe Shqipëria u tronditën nga një vrasje makabër. Viktimë mbeti një nënë e re, Liridona Ademaj, e cila u vra barbarisht në sy të dy fëmijëve të saj të mitur me urdhër të bashkëshortit të saj, Naim Murseli.
31-vjeçarja u vra pa mëshirë me një plumb në qafë në një zonë të shkretë në fshatin Sinidoll të Prishtinës. E gjithë ngjarja ndodhi në automjetin ku Liridona së bashku me dy fëmijët e saj të mitur dhe bashkëshortin ishin duke u kthyer për në banesë pas një darke që kishin konsumuar së bashku si familje.
Fillimisht u raportua se ngjarja ndodhi pasi një person tentoi t’i grabisë, mirëpo pas hetimeve të bëra nga autoritetet kosovare rezultoi se ishte bashkëshorti i saj ai i cili kishte paguar njerëz për të vrarë gruan me të cilën kishte më shumë se 10 vite i martuar.
Për këtë ngjarje në pranga janë tre persona, Naim Murseli, Granit Plava i cili dyshohet që është dhe vrasësi dhe Kushtrim Kokalla.
