Presidenti i Koresë së Jugut, Yoon Suk Yeol, është ndaluar nga Agjencia e Antikorrupsionit në Seul, duke u përballur me akuza për tradhti lidhur me një tentativë për grusht shteti më 3 dhjetor. Ky rast shënon një moment historik, pasi është hera e parë që një president në detyrë, edhe pse i pezulluar për shkak të një procedure shkarkimi, arrestohet në vend.
Gjatë hetimit, Yoon refuzoi të jepte dëshmi dhe, pas largimit nga pallati presidencial, u publikua një deklaratë e tij treminutëshe, ku ai shprehej:
“Rendi ligjor në Korenë e Jugut ka rënë plotësisht. Kam vendosur të ndjek këto procedura të paligjshme vetëm për të shmangur konflikte dhe gjakderdhje, por nuk e njoh këtë hetim.”
Yoon, 64 vjeç, që më parë ka mbajtur postin e Prokurorit të Përgjithshëm, është presidenti i parë në historinë e vendit që arrestohet ndërsa është ende në detyrë, megjithëse i pezulluar për akuzat e shpërdorimit të pushtetit dhe përmbysjes së rendit kushtetues. Pezullimi i tij ndodhi më 14 dhjetor pas shpalljes së një gjendjeje ushtarake që zgjati vetëm gjashtë orë, por shkaktoi kaos në vend dhe më pas u anulua nga parlamenti.
Arrestimi i Yoon u krye pas një operacioni të madh të forcave të sigurisë, ku rreth 3,000 policë thyen barrikadat dhe kaluan telat me gjemba për të hyrë në rezidencën presidenciale.
