Një shpërthim i fuqishëm ka tronditur qytetin e Lezhës të dielën, rreth orës 23:00, në lagjen Besëlidhja.
Sipas Policisë, ngjarja ka ndodhur në një byrektore, duke lënë pasoja të mëdha në dëme materiale, jo vetëm në objektin ku ka ndodhur shpërthimi, por edhe në dy bizneset ngjitur, në tre makina të parkuara aty pranë dhe në xhamat e pallateve përreth.
Sipas hetimeve të para, shpërthimi ka ardhur nga një bombol gazi. Zhurma ka qenë aq e madhe sa një pjesë e banorëve kanë dalë të traumatizuar nga banesat, por fatmirësisht nuk raportohet për persona të lënduar.
Njoftimi i policisë
“Rreth orës 23:00, të datës 05.04.2026, në qytetin e Lezhës, në brendësi të një biznesi (lokal byrektore), në pronësi të shtetasit K. M., dyshohet se ka shpërthyer një bombol gazi.
Si pasojë, janë shkaktuar dëme materiale në lokal, janë dëmtuar xhamat e 3 automjeteve të parkuara pranë tij, si dhe janë konstatuar dëmtime të jashtme në dy bizneset ngjitur.
Grupi hetimor, nën drejtimin e Prokurorisë, ndodhet në vendngjarje dhe vijon intensivisht veprimet për sqarimin e plotë të rrethanave dhe të shkakut të shpërthimit, si dhe për dokumentimin e plotë ligjor të rastit”, njofton policia.
