Qeveria shqiptare ka vendosur të ndërhyjë për të zbutur efektet e rritjes së çmimeve të karburanteve, duke miratuar një akt normativ për uljen e akcizës me 20%.
Vendimi vjen si reagim ndaj rritjes së ndjeshme të çmimit të naftës në tregjet ndërkombëtare, e ndikuar edhe nga tensionet e fundit në Lindjen e Mesme. Sipas këtij akti, ulja e akcizës do të zbatohet në rastet kur çmimi i shitjes me pakicë, i përcaktuar nga Bordi i Transparencës, kalon kufijtë e caktuar.
Konkretisht, masa parashikon uljen e akcizës me 20% nëse:
çmimi i naftës tejkalon 220 lekë për litër;
çmimi i benzinës kalon 200 lekë për litër.
Ministri i Financave, Petrit Malaj, deklaroi se ky vendim është në përputhje me angazhimin e bërë nga Edi Rama për të ndërmarrë masa konkrete në mbështetje të qytetarëve.
Sipas tij, ndërhyrja synon të amortizojë ndikimin financiar që vjen nga zhvillimet ndërkombëtare, veçanërisht nga konflikti në Iran dhe luhatjet e fundit në tregjet globale të energjisë.
Akti normativ do të qëndrojë në fuqi deri në stabilizimin e situatës ndërkombëtare, ndërsa qeveria thekson se mbetet e angazhuar për të mbrojtur ekonominë dhe buxhetin e shtetit në këtë periudhë sfiduese.
