Tensionet dhe përplasjet mes deputetëve të opozitës dhe mazhorancës në Kuvend kane vijuar në disa episode gjatë seancës të së enjtes!
Një prej tyre ndodhi mes Bora Muzhaqit dhe Albana Vokshit.
Kjo e fundit kërkoi përjashtimin e Taulant Ballës nga seanca dhe dënimin me dy muaj duke e quajtur “sharlatan”, teksa iu drejtua kolegeve të mazhorancës nëse: “kishin motra, nëna dhe gra” në familjet e tyre për fyerjet seksiste që Balla i kishte bërë dhe intimidimet e vazhdueshme në Kuvend.
Nga ana saj, Muzhaqi gjatë fjalës së saj ia ktheu Vokshit duke i kujtuar fjalorin e saj dhe iu drejtua po me të njëjtën pyetje që shkaktoi irritimin e opozitares.
Përplasja verbale mes dy ligjvënëseve ka degraduar në tone të ashpra, duke kaluar nga diskutimi politik në replika personale.
Gjatë debatit, Muzhaqi i është drejtuar Vokshit me fjalët: “Si do të vinte ty po t’i thonin vajzës tënde atë që më the ti mua?!”
Kjo deklaratë ka shkaktuar reagimin e menjëhershëm të Vokshit, e cila i është përgjigjur me tone të larta:
“Mos i përmend fëmijët e mi. Mbylle gojën. Fëmijët e mi mos mi përmend kurrë. Mbylle gojën. Pusho… të të vijë turp, turp të kesh, mos m’i përmend fëmijët këtu, more vesh…!”.
Nga ana e saj, Muzhaqi ka vijuar replikën duke theksuar: “Ti mos m’i përmend prindërit”.
Ndërsa Vokshi ka reaguar sërish ashpër: “Fëmijët e mi në këtë grup të qelbur mos mi përmend. Mos guxo ta hapësh gojën… turp!”.
