Robert Lewandowski ka lënë vend për shumë interpretime pas eliminimit të Polonisë nga gara për Botërorin 2026. Pas humbjes 3-2 ndaj Suedisë në play-off, sulmuesi publikoi një foto me shiritin e kapitenit në Instagram, ndërsa në sfond ishte kënga “Time to Say Goodbye”, një detaj që u pa menjëherë si sinjal i mundshëm i fundit të tij me kombëtaren. Associated Press raportoi se postimi u interpretua si një lamtumirë e mundshme, edhe pse vetë lojtari nuk e ka konfirmuar zyrtarisht tërheqjen.
Për polakun, kjo ishte një goditje e rëndë jo vetëm sportive, por edhe emocionale. Ai rikthehet te Barcelona pas 180 minutash shumë intensive me kombëtaren, ku dha gjithçka për të mbajtur gjallë ëndrrën e Polonisë, por pa arritur dot ta çojë ekipin në turneun më të madh. Në këtë moshë, gjithçka të bën të mendosh se ky mund të ketë qenë shansi i fundit i madh ndërkombëtar për të.
Tani vëmendja e Lewandowskit do të kalojë sërish te Barcelona, aty ku e presin dy muaj vendimtarë mes garës për La Ligën dhe Champions League. Mes lodhjes fizike, zhgënjimit me Poloninë dhe pikëpyetjeve për të ardhmen e tij në klub, sulmuesi hyn në një nga momentet më delikate të sezonit.
