Një aksident tragjik ka ndodhur ditën e djeshme në Austri, ku ka humbur jetën një 18-vjeçar nga Kosova. Sipas raportimeve të mediave, aksidenti ka ndodhur mes një kamioni dhe një veture.
Sipas mediave austriake, duke cituar policinë lokale, raportojnë se ngjarja ka ndodhur rreth mesditës në rrugën B126, kur dy automjetet janë përplasur në një kthesë të djathtë.
Si pasojë e përplasjes, drejtuesi 18-vjeçar i veturës ka humbur jetën në vendngjarje, pavarësisht përpjekjeve të mjekëve për ta rikthyer në jetë.
Ndërkohë, pasagjeri që ndodhej në makinë është në gjendje të rëndë. Të dy të rinjtë, që jetonin në Linz, mbetën të bllokuar në veturë dhe u desh ndërhyrja e zjarrfikësve për t’i nxjerrë nga automjeti.
Autoritetet austriake po vijojnë hetimet për zbardhjen e plotë të rrethanave të ngjarjes.
