Arsenali ka një mundësi të artë për ta mbyllur këtë sezon në mënyrë historike. “Topçinjtë” kryesojnë Premier League me nëntë pikë avantazh ndaj Manchester Cityt, janë në çerekfinalet e FA Cup dhe do të përballen me Sportingun në të njëjtën fazë të Champions League. Megjithatë, në prag të pjesës më vendimtare të sezonit, skuadra e Mikel Artetës po përballet me një problem serioz: dëmtime dhe shqetësime fizike te lojtarët e kthyer nga kombëtaret.
Sipas raportimeve në Angli, situata po shihet si një krizë e mundshme, pasi deri në 10 lojtarë janë rikthyer para kohe nga grumbullimet për shkak të problemeve fizike. Rasti më i fundit është ai i Martín Zubimendit. Federata Spanjolle bëri të ditur se mesfushori u largua nga grumbullimi për shkak të shqetësimeve në gjurin e djathtë. Pas vetëm 13 minutash në ndeshjen ndaj Serbisë, stafi mjekësor i Spanjës, në bashkëpunim me atë të Arsenalit, vendosi që lojtari të rikthehej në Angli për të mos rrezikuar më tej gjendjen e tij.
Situata është shqetësuese edhe me lojtarët e Anglisë. Noni Madueke, Declan Rice, Bukayo Saka dhe Eberechi Eze janë liruar në momente të ndryshme. Eze u grumbullua, por nuk iu bashkua fare ekipit, për shkak të një dëmtimi në pulpë. Rice dhe Saka qëndruan vetëm një ditë me kombëtaren, për t’u rikthyer te klubet e tyre për vlerësime mjekësore. Trajneri Thomas Tuchel deklaroi se të dy kishin shqetësime dhe se nuk kishte kuptim të rrezikoheshin. Madueke, nga ana tjetër, u pa me mbajtëse në gjurin e majtë pas barazimit 1-1 ndaj Uruguait, megjithëse ka optimizëm se rikuperimi i tij nuk do të zgjasë shumë.
Edhe mbrojtja e Arsenalit është prekur ndjeshëm. William Saliba u largua nga grumbullimi i Francës për shkak të një dëmtimi në kyçin e majtë, me një periudhë rikuperimi prej rreth 10 ditësh. Jurrien Timber nuk u aktivizua fare me Holandën, ndërsa Gabriel u lirua nga Brazili për shkak të një problemi në gjurin e djathtë. Piero Hincapié, një tjetër mbrojtës që mori minuta me kombëtaren, u zëvendësua në minutën e 72-të ndaj Marokut pas një goditjeje dhe më pas u lejua të largohej nga grumbullimi. Edhe Leandro Trossard nuk luajti për Belgjikën, pasi federata belge dhe Arsenali ranë dakord që ai të vazhdonte rikuperimin në Londër pas një dëmtimi në ijë.
Ndërkohë, disa lojtarë të Arsenalit vazhdojnë ende angazhimet me kombëtaret e tyre, mes tyre David Raya, Riccardo Calafiori, Ben White, Lewis-Skelly, Christian Norgaard, Gabriel Martinelli, Viktor Gyökeres dhe Kai Havertz. Por edhe kjo sjell rrezik shtesë, sidomos për ata që po luajnë ndeshje me presion të lartë. Gyökeres, për shembull, shkëlqeu me Suedinë duke shënuar tre gola kundër Ukrainës në gjysmëfinalen e play-off-it për Kupën e Botës. Me një kalendar kaq të ngarkuar dhe shumë ndeshje vendimtare përpara, Arsenali po hyn në fazën më të rëndësishme të sezonit me një pasiguri të madhe sa i përket gjendjes fizike të skuadrës.
