Igor Tudor është larguar nga Tottenham Hotspur pas vetëm gjashtë javësh në krye të skuadrës, pas një periudhe shumë të vështirë dhe një humbjeje të rëndë personale.
Tottenham e kishte emëruar trajnerin kroat vetëm muajin e kaluar, por ai u largua pas humbjes 3-0 në shtëpi ndaj Nottingham Forest, një ndeshje vendimtare për mbijetesë, që ishte edhe e shtata për të në stol.
Klubi londinez konfirmoi se ndarja me Tudor është bërë me marrëveshje të përbashkët. Spurs iu drejtuan 47-vjeçarit pas shkarkimit të Thomas Frank, me ekipin në një situatë të rrezikshme në Premier League. Megjithatë, ish-trajneri i Juventusnuk arriti të ndalte rënien, me Tottenham që tani ndodhet vetëm një pikë mbi zonën e rënies nga kategoria.
Humbja ndaj Nottingham Forest, që e nisi ditën poshtë tyre në renditje, rezultoi vendimtare për fatin e tij. Tudor nuk foli për mediat pas ndeshjes, pasi mësoi menjëherë pas vërshëllimës përfundimtare se babai i tij, Mario, kishte ndërruar jetë.
Me Tottenham që nuk do të luajë deri në ndeshjen ndaj Sunderland më 12 prill, të dyja palët vendosën të ndërpresin bashkëpunimin. Në një deklaratë zyrtare, klubi tha:
“Konfirmojmë se është arritur marrëveshje e përbashkët që trajneri Igor Tudor të largohet nga klubi me efekt të menjëhershëm.
Tomislav Rogic dhe Riccardo Ragnacci janë larguar gjithashtu nga rolet e tyre si trajner i portierëve dhe trajner fizik. I falënderojmë Igor, Tomislav dhe Riccardo për përpjekjet e tyre gjatë këtyre gjashtë javëve, ku punuan pa u lodhur.”
Tudor humbi pesë ndeshjet e para në krye të Tottenham, përpara se të ndalte disi ecurinë negative me një barazim ndaj Liverpool dhe një fitore ndaj Atletico Madrid në UEFA Champions League. Megjithatë, kjo fitore nuk mjaftoi për të kaluar në çerekfinale, duke lënë mbijetesën në kampionat si objektivin e vetëm.
Ky vendim e lë Tottenham në kërkim të trajnerit të katërt brenda më pak se një viti. Klubi kishte shkarkuar Ange Postecoglou verën e kaluar, pavarësisht se kishte fituar UEFA Europa League.
