Një ambient i përshtatur për kultivimin e bimëve narkotike është zbuluar nga Policia, në lagjen “Popullore” në Shijak.
Sipas policisë, magazina ishte marrë me qira nga shtetasi J. Gj. dhe ishte përshtatur me pajisje të ndryshme për kultivimin e kanabisit, të cilat furnizoheshin përmes një lidhjeje të paligjshme të energjisë elektrike.
Gjatë kontrollit në këtë ambient, shërbimet e Policisë sekuestruan 180 vazo ku më parë ishin kultivuar bimë narkotike, të prera para ndërhyrjes së Policisë, si dhe boçe e mbetje të dyshuara kanabisi. Po ashtu u gjetën pajisje të ndryshme ndihmëse, si pompë uji, filtër ajrimi, tuba aspirimi, 7 llamba elektrike, 7 ventilatorë, 16 paketa energjie, bllok siguresash dhe pajisje të tjera të përdorura për këtë aktivitet.
Në vijim të veprimeve u arrestuan në flagrancë katër shtetas:
- K., 54 vjeç dhe J. Gj., 31 vjeç, të dyshuar për “Kultivim të bimëve narkotike”, kryer në bashkëpunim;
- D., 24 vjeç, për veprën penale “Moskallëzim i krimit”;
- B., 61 vjeç, për “Shpërdorim detyre”.
Ndërkohë është shpallur në kërkim shtetasi D. K., 25 vjeç, i dyshuar gjithashtu për kultivim të bimëve narkotike në bashkëpunim.
Nga hetimet dyshohet se shtetasi L. K., në bashkëpunim me djalin e tij D. K., ia kishin dhënë ambientin me qira J. Gj., i cili më pas e kishte përshtatur për kultivim kanabisi në bashkëpunim me persona të tjerë.
Gjithashtu, shtetasi R. B., punonjës i OSHEE-së, dyshohet se nuk ka raportuar lidhjen e paligjshme të energjisë elektrike, ndërsa shtetasi S. D. dyshohet se kishte dijeni për aktivitetin kriminal dhe nuk e ka kallëzuar.
Policia bën me dije se vijon puna për kapjen e 25-vjeçarit në kërkim dhe për dokumentimin e plotë të kësaj veprimtarie kriminale.
Materialet procedurale i janë referuar Prokurorisë së Durrësit për veprime të mëtejshme.
