Të tjera detaje kanë dalë në dritë lidhur me atentatin e së dielës ku biznesmeni 56-vjeçar, Bujar Nasufi u ekzekutua me gjashtë plumba para banesës së tij në zonën e “Pallatit me Shigjeta”.
Burime pranë grupit hetimor bëjnë me dije se pista e rrethanave familjare mbetet kryesore. Dyshimet deri më tani janë se viktima Bujar Nasufi, ka pasur konflikte për pronat me anëtarët e tjerë të fisit të tij. Për këtë arsye, po punohet për verifikimin e tyre.
Ngjarja e rëndë u regjistrua mbrëmjen e së dielës. Viktima Bujar Nasufi doli nga mobilieria, në të cilën ishte bashkëpronar bashkë me vëllain e tij, rreth orës 20:20.
Nga rruga “Irfan Tomini” 56-vjeçari i shoqëruar nga bashkëshortja e tij u drejtuan drejt banesës së tyre në rrugën “Myrte Zeneli” me automjetin tip “Benz” ngjyrë gri.
Në afërsi të banesës ka qenë autori i maskuar si shpërndarës picash teksa po e ruante Nasufin. Në momentin sapo bashkëshortja e tij zbriti nga automjeti, mësohet se autori i është afruar automjetit ku ndodhej viktima dhe e ka qëlluar me 6 plumba, dy prej të cilave e kapën në pjesën e gjoksit duke i shkaktuar edhe vdekjen.
Familja Nasufi me origjinë nga Berati prej kohësh ishin pozicionuar në Tiranë. Prej vitesh pesë vëllezërit Nasufi, së bashku me familjet e tyre jetojnë në zonën e “Selitës së Vogël”. Ata rezultojnë të jenë pronarë të disa bizneseve në rrugën “Irfan Tomini”.
Burime për mediat bëjnë me dije se familjarët kanë deklaruar para oficerëve se pronat janë ndarë që herë dhe nuk ka pasur asnjë problem mes vëllezërve.
Policia është duke punuar për identifikimin dhe kapjen e autorit ndërkohë dhe për zbardhjen e plotë të kësaj ngjarje. Në orët në vijim priten më tepër detaje!
