Këngëtari i njohur i muzikës popullore, Ervis Behari, ka ndarë një histori prekëse nga jeta e tij gjatë një interviste në Top Channel. Ai ka folur për hapat e tij të para në muzikë dhe për këngët që ka dedikuar për njerëzit e dashur. Në repertorin e tij muzikor, kënga më e veçantë është ajo që ai ka shkruar për nënën e tij të ndjerë.
“Kënga e Nënës” është xhiruar rastësisht në ditën kur nëna e tij humbi jetën nga një sëmundje e rëndë që vuante. Ai ka treguar se, ndërkohë që po xhironte klipin, nuk e dinte ende lajmin e trishtë.
“Kur nëna ime ndërroi jetë, nuk e kam ditur. Unë atë ditë po xhiroja klipin ‘Kënga e nënës’. Rrugës më thirri babai dhe më dha lajmin. Adrian Hila ka qenë me mua në atë moment dhe vazhdon të jetë deri tani. Ai e dinte historinë dhe atë ditë, kur po xhironim klipin, ishte edhe momenti kur ajo ndërroi jetë,” tregoi këngëtari me emocione.
Ervis Behari shprehet i lumtur për vazhdimësinë e karrierës së tij dhe për faktin që ka mundur ta bëjë krenar nënën e tij përmes muzikës.
“Jam shumë i lumtur që kam bërë zgjedhjen më të mirë, që të vazhdoj muzikën dhe ta bëj krenare atë në çdo hap të jetës sime. Dua që prindërit e mi të ndihen krenarë për çdo gjë që bëj dhe besoj se edhe ajo është e lumtur për arritjet e mia,” përfundoi ai.
