Edhe një vit tjetër në krye të klubit madrilen.
Atlético Madrid i ka dhënë fund zërave për një largim të mundshëm të liderit të saj prej vitesh. Sipas Diario AS, Diego Simeone do të mbetet në stolin e “Colchoneros” edhe për sezonin 2026/27. Madje, palët kanë nisur tashmë bisedimet edhe për një zgjatje të mundshme të marrëveshjes deri në verën e vitit 2028.
Klubi dhe trajneri argjentinas kanë zhvilluar disa takime, në përfundim të të cilave është arritur në një vendim të përbashkët: cikli i Simeones te Atlético Madridi nuk ka përfunduar ende.
Një pikë e rëndësishme e marrëveshjes është se asnjëra palë nuk ka dashur të aktivizojë klauzolën speciale në kontratë, e cila do t’u jepte mundësinë të ndanin rrugët një vit më herët. Kjo tregon besimin dhe besnikërinë e ndërsjellë mes klubit dhe trajnerit.
Ndërkohë, departamenti sportiv i klubit, i drejtuar nga Carlos Bucero dhe Mateu Alemany, ka nisur punën për ndërtimin e skuadrës së sezonit 2026/27, duke u mbështetur plotësisht te vizioni i Simeones. Sipas raportimeve, “El Cholo” është i informuar për planet në merkato dhe po merr pjesë aktivisht në vlerësimin e afrimeve të reja.
