Mesfushori anglez ka treguar vështirësitë që përjetoi gjatë dëmtimit përmes aplikacionit të tij personal.
Kur Jude Bellingham iu bashkua Real Madridit në vitin 2023, ai erdhi me një pritshmëri të jashtëzakonshme. Nuk ishte thjesht një transferim i rëndësishëm, por ardhja e një talenti të rrallë, i destinuar për të lënë gjurmë. Dhe ai nuk humbi kohë për ta vërtetuar këtë. I aktivizuar shpesh si një “false nine”, anglezi mori rolin e golashënuesit dhe regjistroi shifra mbresëlënëse: 23 gola dhe 14 asiste në 42 ndeshje në të gjitha kompeticionet.
Por, mes kësaj forme fantastike, gjithçka ndryshoi në një ndeshje të nëntorit ndaj Rayo Vallecanos. Një rënie, një lëvizje e pafat dhe shpatulla e tij doli nga vendi. Ai dëmtim u kthye në një moment vendimtar për sezonin e tij.
“Te Dortmundi më thanë se më duhej operacion në shpatull”
“Gjithçka nisi ditën e ndeshjes me Rayon. Ishte ndjesia më e dhimbshme që kam përjetuar ndonjëherë,” kujton Bellingham në aplikacionin e tij personal, JB5. “M’u duk sikur kaloi një përjetësi derisa ma vendosën sërish në vend… dhe në fakt kishin kaluar vetëm 90 sekonda nga momenti kur stafi mjekësor hyri në fushë.”
Ai tregoi se kjo nuk ishte hera e parë që përballej me një problem të tillë: “Edhe më parë më kishte dalë nga vendi disa herë dhe kisha arritur ta vendosja vetë.”
Problemi kishte nisur që më herët. Gjatë kohës te Borussia Dortmundi, ai ishte paralajmëruar tashmë: “Në sezonin tim të fundit te Dortmundi, që në fillim, më thanë se më duhej operacion në shpatull pas një rënieje të keqe. E dija që diçka nuk shkonte, por ishte gusht-shtator dhe Botërori ishte në dhjetor, ndaj nuk e bëra operacionin.” Më pas, përmirësimi i gjendjes bëri që ai ta linte problemin pas dore: “Kur erdha te Real Madridi, nuk kisha dhimbje.”
“Nuk doja ta lija skuadrën në baltë”
Megjithatë, vendimi për ta shtyrë operacionin pati pasoja: “Të gjithë më thoshin se duhej ta bëja operacionin, por ishte viti im i parë te Real Madridi dhe nuk doja ta lija skuadrën e të mungoja për tre muaj.”
Sipas tij, ky dëmtim ndikoi më shumë seç dukej: “Problemi me shpatullën ndikoi shumë edhe në pjesën tjetër të trupit tim. Nuk kisha shumë dhimbje, por fakti që luaja duke e ditur se nëse rrëzohesha mund të më dilte sërish nga vendi, më pengonte të jepja maksimumin.”
Edhe pas humbjes së finales së Kampionatit Europian ndaj Spanjës, ai nuk mori vendimin për operacion: “Nuk doja që ajo të ishte ndjesia ime e fundit për tre muaj, por në fakt ai do të kishte qenë momenti më i mirë për ta bërë operacionin. Vendosa të vazhdoja edhe një vit tjetër dhe nuk duhej ta kisha bërë.”
Tani, me më shumë kthjelltësi, Bellingham e pranon gabimin, por sheh përpara me optimizëm: “Viti i kaluar më bëri të kuptoj se fitimi nuk duhet marrë si diçka e garantuar. Tani jam në gjendje më të mirë fizike dhe mund të rikthehem në nivelin tim.”
