Kryeministri Edi Rama, në rubrikën në rrjetet sociale ‘Sy m’my’ i është përgjigjur një komentuesi i cili i drejtohet kryeministrit duke i thënë se është një komsumator i lëndëve narkotike.
“Të ka ikur hunda shtrembët, vetëm ti mos fol për drogë”- i shkruan komentuesi Ramës, por ky i fundit në përgjigje i thotë se “po është e vërtetë që këtë kockën e hundës nuk e kam të drejtë. Kjo sepse ajo katranpartia që ta ka mbushur mendjen se jam drogaxhi, ma ka thyer hundën bashkë me kafkën mbrapa. Më ka carë dhe buzën, me leva dhe doreza hekuri”.
Më tej Rama tregon sesi në janar të vitit 1997 është dhunuar pasi po mblidhte firma për dorëheqjen e qeverisë së asaj kohe në mënyrë që të mos ndodhte skema e piramidave.
Kreu i qeverisë tregon dhe foto i dhunuar dhe thotë se u la i gjakosur në rrugë dhe të nesërmen u tha se ishte një sherr për ndonjë vajzë.
“Dhe ja po të tregoj se ti me siguri je i ri dhe s’e ke idenë e piramidave të Sudës dhe Rrapushit, që ua grabitën shqiptarët të tëra kursimet me bekimin e katranit të madh të asaj partie që të ka mësuar edhe ty si plotë të tjerë, të shkruash e të thuash që unë jam drogaxhi.
Ishte viti 1997 dhe unë mblidhja firma nga shoqëria civile për një peticion që dorëheqjen e qeverisë së asaj kohe që të shmangej ato katastrofë që ndodhi më pas, kur më dolën në pritë mu poshtë shtëpisë, mes errësirës dhe balës së dimrit, të Tiranës së asaj kohe. Ishte janar, si tani dhe më lanë në rrugë mbuluar me gjak. Dhe të nesërmen, doli një klloun e katran partisë, si Gazment Ziut të sotëm dhe tha do ketë qenë punë për një sherr të ndonjë femre”,tha Rama.
Ndër të tjera kreu i qeverisë këshillon komentuesin të mos përdoret si “top balte” në luftën për pushtet të disa të tjerëve.
“Epo, s’ka më keq Ardit! Nuk ka më keq të thuash për tifozllëk politik, fluturon gomari, duke u përdorur si një top balte në luftën e pistë për pushtet të disa të tjerëve që s’kanë asnjë lidhje me ty, por ty të përdorin. Ti as më njeh, as s’ke ndonjë provë që unë marr drogë. Unë vetë s’kam asnjë gjë me ty sepse as nuk të njoh as nuk e di kush je, madje s’është çudi të jesh djalë i mirë në punën tënde.
S’ka nevojë as të më duash mua, as të votosh për mua që të jesh dinjitoz dhe të respektosh veten. Sa më shumë ta respektojnë veten njerëzit e zakonshëm, si ti, duke mos imituar këtë modelin e katran politikës verbërisht në stadium, por duke ruajtur dinjitetin edhe në verbëri, aq më shumë shtohen shanset që kjo politikë turpi në Shqipëri, ti hiqet qafe shoqërisë. Ta ketë dhe Shqipëria një opozitë dinjitoze, jo një çetë sharje shpifësish si kjo këtu, që s’ka jo skuadër e program, po as din e iman”, u shpreh Rama.
