Një skandal me përmasa të forta ka shpërthyer në sistemin e drejtësisë shqiptare, duke vënë në lëvizje institucionet më të rëndësishme të hetimit. Pas publikimit të pamjeve nga emisioni “STOP”, SPAK ka nisur zyrtarisht hetimet për rastin që implikon një anëtar të KLP.
Bëhet fjalë për Olger Eminaj, i cili në materialet e publikuara shfaqet në komunikime me përmbajtje intime me një qytetare që kishte kërkuar ndihmë institucionale për një çështje që lidhej me prokuroren Rovena Zoto.
Materialet, të siguruara nga “Shoqata Media dhe Drejtësi” dhe të transmetuara në emisionin investigativ, kanë nxitur reagimin e menjëhershëm të strukturave ligjzbatuese. Sipas gazetarit Elton Qyno, procedimi penal është regjistruar kryesisht mbi bazën e këtyre pamjeve filmike, të cilat përfshijnë si komunikime, ashtu edhe përmbajtje të ndjeshme.
Në hetim është përfshirë edhe Byroja Kombëtare e Hetimit, e cila pritet të administrojë dhe analizojë të gjitha provat e mbledhura. Me urdhër të prokurorit të gatshëm, një oficer i BKH-së është caktuar për të marrë në dorë materialet e siguruara nga gazetarët, të cilat do t’u vihen në dispozicion hetuesve për verifikim të mëtejshëm.
Burime pranë hetimit bëjnë me dije se në ditët në vijim pritet të merren në pyetje të gjithë personat e përfshirë në këtë çështje, përfshirë vetë Eminajn dhe gruan që shfaqet në pamjet e publikuara.
Ndërkohë, rasti ka tronditur opinionin publik dhe ka vënë nën presion institucionet e drejtësisë. Megjithatë, deri më tani nuk ka pasur reagim zyrtar nga KLP dhe ILD, duke shtuar edhe më shumë pikëpyetje mbi trajtimin institucional të këtij skandali.
