Trajneri i Barcelonës, Hansi Flick, ka konfirmuar se Joan García do të jetë sërish titullar në ndeshjen ndaj Rayo Vallecano, pavarësisht shqetësimit që portieri pati në sfidën e fundit ndaj Newcastle.
Në konferencën për shtyp para ndeshjes, tekniku gjerman e bëri të qartë se nuk ka asnjë plan për ta pushuar gardianin blaugrana, duke treguar se gjendja e tij është e mirë. Flick u shpreh i lumtur edhe për faktin që Joan García është grumbulluar me kombëtaren e Spanjës.
“Pushim? Jo. Ai mund të luajë nesër. Jam shumë i lumtur për të edhe për grumbullimin në kombëtare,” deklaroi trajneri i Barcelonës.
Ndërkohë, Eric García nuk pritet ta nisë ndeshjen nga minuta e parë. Flick sqaroi se mbrojtësi do të jetë në stol dhe se mbetet për t’u parë nëse do të aktivizohet gjatë sfidës. Po ashtu, trajneri foli shkurt edhe për mungesën e tij në listën e Spanjës, duke respektuar plotësisht vendimin e trajnerit të kombëtares.
“Është vendimi i trajnerit të kombëtares. Nuk është vendimi im,” theksoi ai.
Në krahun e djathtë të mbrojtjes, Barcelona mund të mbështetet te një tjetër talent i ri. Xavi Espart, një nga emrat e rinj që ka dalë nga La Masia, ka lënë përshtypje shumë të mira te Flick. Trajneri gjerman vlerësoi qetësinë dhe sigurinë e tij në fushë, duke lënë të kuptohet se mund të bëhet një element shumë i rëndësishëm për skuadrën në të ardhmen.
Përtej kësaj, Flick foli edhe për gjendjen e lojtarëve në repartin ofensiv. Ai nënvizoi se objektivi është ruajtja e ritmit dhe rikthimi në formën më të mirë i disa futbollistëve si Rashford, Lewandowski dhe Ferran Torres, duke veçuar sidomos këtë të fundit për momentin pozitiv që po kalon.
Barcelona synon të vazhdojë momentin e mirë edhe ndaj Rayo Vallecano, me Joan Garcían që pritet të jetë një nga protagonistët kryesorë, pak para se t’i bashkohet kombëtares spanjolle.
