Qeveria federale gjermane po lehtëson rregullat për eksportin e disa pajisjeve të caktuara ushtarake për një sërë shtetesh të Gjirit Persik dhe për Ukrainën. Kjo mundësohet pas hyrjes në fuqi të një autorizimi të ri të përgjithshëm, i cili është i vlefshëm për gjashtë muaj. Këtë e bëri të ditur Ministria Federale e Ekonomisë.
Eksportuesit tani mund të përfitojnë nga leje më të shpejta eksporti, pa qenë nevoja të paraqesin më parë një kërkesë për eksport pranë Zyrës Federale për Ekonominë dhe Kontrollin e Eksporteve (BAFA).
Pajisjet për mbrojtjen ajrore urgjentisht të nevojshme
Ministrja federale e Ekonomisë, Katherina Reiche, tha se sulmet e Iranit ndaj shteteve të Gjirit Persik i kanë bërë atje urgjentisht të nevojshme pajisjet ushtarake, veçanërisht ato për mbrojtjen ajrore. Në të njëjtën kohë edhe Ukraina vazhdhon të ketë nevojë për mbështetje ushtarake, sidomos në fushën e mbrojtjes ajrore.
Sipas Ministrisë së Ekonomisë vendet përfituese nga ky autorizim përfshijnë Arabinë Saudite, Emiratet e Bashkuara Arabe, Katarin, Kuvajtin, Bahreinin, Omanin, si dhe Ukrainën. Sipas të dhënave lejohet eksporti i “mallrave për përdorim në mbrojtjen ajrore dhe mbrojtjen detare”. Autorizimi përfshin gjithashtu edhe lejimin e shitjes së pajisjeve për mbrojtjen nga minat detare ose për neutralizimin e tyre. /DW
