Arsenal ka siguruar me bindje kualifikimin në çerekfinalet e Champions League, pasi mposhti Bayer Leverkusenin me rezultatin 2-0 në “Emirates”, në një mbrëmje ku londinezët konfirmuan forcën dhe ambicien e tyre europiane.
Skuadra e Mikel Artetës dominoi ndeshjen që nga minuta e parë, duke ushtruar presion të vazhdueshëm dhe duke krijuar një sërë rastesh për gol. Portieri Janis Blaswich mbajti për një kohë në lojë Leverkusenin me disa pritje të rëndësishme, sidomos ndaj Leandro Trossard, por rezistenca e gjermanëve u thye nga një moment magjik i Eberechi Eze.
Mesfushori anglez realizoi një supergol me volej nga hyrja e zonës, duke ndezur festën në “Emirates” dhe duke i dhënë Arsenalit avantazhin e merituar. Goli i tij shpërbleu epërsinë e qartë të vendasve dhe i afroi edhe më shumë drejt kualifikimit.
Në pjesën e dytë, Arsenali vazhdoi të kontrollonte lojën dhe gjeti edhe golin e dytë me Declan Rice. Mesfushori anglez shënoi golin e tij të parë në këtë edicion të Champions League, duke vulosur praktikisht fatin e përballjes dhe duke konfirmuar rolin e tij gjithnjë e më vendimtar në skuadrën e Artetës.
Leverkuseni provoi të reagonte, por Arsenal mbeti solid edhe në prapavijë. Në fund, David Raya bëri edhe një pritje spektakolare në minutën e 85-të, duke mbrojtur avantazhin dhe duke mbyllur një tjetër paraqitje shumë të mirë personale.
Me këtë sukses, Arsenali kalon për të tretin sezon radhazi në çerekfinalet e kompeticionit më të rëndësishëm për klube në Europë dhe dërgon një sinjal të fortë për rivalët. Londinezët duken më të pjekur se kurrë dhe gjithnjë e më shumë po sillen si një skuadër që mund të ëndërrojë seriozisht trofeun.
