Pas shkarkimit të Sean Dyche, Everton nisi kërkimin për trajnerin e ri. Shumë emra u lidhën me ‘Toffees’ gjatë kësaj periudhe, ndër ta edhe Paulo Fonseca, i cili sapo ishte larguar nga Milani. Megjithatë, nuk do të jetë Fonseca trajneri i ri i skuadrës angleze, pasi klubi ka zgjedhur një profil tjetër.
Sipas asaj që raporton ‘Sky Sports UK’, David Moyes ka pranuar të bëhet trajner i Everton-it pas bisedimeve të sotme me pronarët e klubit, familjen Friedkin. Kthimi i Moyes (i cili kishte drejtuar klubin nga viti 2002 deri në 2013, për plot nëntë vite) pritet të shpallet zyrtarisht brenda 24 orëve të ardhshme.
Në dhjetor, Moyes kishte deklaruar për këtë televizion:
“Nuk dua të pranoj një punë ku jam i detyruar të luftoj gjithmonë për të shmangur rënien nga kategoria. Për shumicën e kohës sa isha tek Evertoni, konkurronim për vende evropiane. Kam kaluar katër vite tek West Hami, tre prej tyre ishin në Evropë. Më pëlqen të mendoj se mund të bëj një punë në një nivel të caktuar, sesa thjesht të shmang rënien. Do të pres mundësinë e duhur dhe, nëse nuk vjen, do të jem i lumtur aty ku jam aktualisht”.
