Irani po negocion me FIFA-n për të zhvendosur në Meksikë ndeshjet që kombëtarja e tij duhet të zhvillojë në Shtetet e Bashkuara gjatë Kupës së Botës, në një përpjekje për të siguruar pjesëmarrjen normale në turne mes tensioneve të forta gjeopolitike.
Sipas raportimit të Cadena SER, media e njohur spanjolle, ambasada iraniane në Meksikë ka konfirmuar se autoritetet e vendit po punojnë për të transferuar në stadiume meksikane sfidat që Irani ka të planifikuara në territorin amerikan. Kombëtarja iraniane pritet të përballet me Belgjikën, Zelandën e Re dhe Egjiptin, me ndeshje të programuara fillimisht në Los Anxhelos dhe Seattle.
Federata iraniane kishte njoftuar disa ditë më parë se, për shkak të ofensivës ushtarake amerikane, kushtet nuk konsideroheshin të përshtatshme për të udhëtuar drejt SHBA-së. Në këtë kontekst, Irani po kërkon që ndeshjet e tij të zhvillohen në qytete si Mexico City, Monterrey dhe Guadalajara, për të shmangur çdo problem që mund të rrezikojë prezencën e skuadrës në Botëror.
Megjithatë, kjo zgjidhje mund të vlejë vetëm për fazën e grupeve, pasi në rast kualifikimi më tej, Irani mund të detyrohet sërish të luajë në SHBA, në varësi të renditjes dhe kalendarit të turneut. Sipas Cadena SER, kjo situatë ka krijuar pasiguri të madhe edhe brenda kampit iranian, ndërsa futbollisti spanjoll Iván Sánchez, i cili aktivizohet në kampionatin iranian, ka deklaruar se lojtarët e kombëtares po e përjetojnë me shumë pasiguri këtë periudhë, pavarësisht entuziazmit që kishin për të përfaqësuar vendin e tyre në Kupën e Botës.
