Rafael Leao nuk konsiderohet më i paprekshëm te Milani. Sipas raportimeve të La Gazzetta dello Sport, drejtuesit kuqezi kanë ndryshuar qëndrim ndaj sulmuesit portugez dhe tashmë janë të hapur për ta shitur në merkaton e ardhshme.
Sipas së përditshmes italiane, sjellja e Leaos në ndeshjet e fundit të Serie A ka ndikuar drejtpërdrejt në këtë vendim. Lojtari, i cili deri pak kohë më parë shihej si një nga figurat kyçe dhe të padiskutueshme të projektit të Milanit, tashmë nuk konsiderohet më i pashitshëm.
Momenti që thuhet se bindi përfundimisht drejtuesit e klubit erdhi në sfidën ndaj Lazios. Në minutën e 66-të, trajneri Massimiliano Allegri vendosi ta zëvendësonte Leaon, ndërsa reagimi i portugezit ishte i ashpër dhe emocional. Sipas raportimit, ai shfaqi pakënaqësi të madhe dhe shtyu edhe shokët e skuadrës që tentuan ta qetësonin.
Edhe pse klauzola e largimit në kontratën e tij është 170 milionë euro, Milani është i vetëdijshëm se një shumë e tillë vështirë se do të ofrohet nga ndonjë klub. Për këtë arsye, kuqezinjtë thuhet se janë gati të dëgjojnë oferta që nisin nga 80 milionë euro.
Leao ka zhvilluar 24 ndeshje këtë sezon me fanellën e Milanit, duke shënuar 10 gola dhe duke dhënë 3 asistime. Kontrata e tij me klubin italian është e vlefshme deri në vitin 2028, ndërsa vlera aktuale në treg, sipas Transfermarkt, vlerësohet rreth 70 milionë euro.
Tashmë mbetet për t’u parë nëse interesimi i klubeve të tjera do të konkretizohet në oferta zyrtare dhe nëse Milani do të vendosë vërtet t’i japë fund bashkëpunimit me një nga emrat më të rëndësishëm të viteve të fundit në “San Siro”.
