Ndeshja e 1/8-ave të Champions League ndaj Atletico Madrid u kthye në një makth të vërtetë për portierin e ri të Tottenham, Antonín Kinský. Çeku 22-vjeçar, i hedhur titullar nga Igor Tudor në një nga sfidat më të rëndësishme të sezonit, pati një debutim shumë të hidhur dhe të vështirë për ta harruar.
Në “Riyadh Air Metropolitano”, presioni i tribunave dhe ritmi i ndeshjes duket se e tronditi plotësisht portierin e ri. Deri në minutën e 16-të, Tottenham ishte tashmë duke humbur 0–3, ndërsa dy nga golat erdhën direkt pas gabimeve të rënda të Kinskýt.
Trajneri Igor Tudor reagoi menjëherë dhe mori një vendim drastik: e zëvendësoi portierin në minutën e 16-të. Një skenë e rrallë për Champions League, ku një portier zëvendësohet që në pjesën e parë për arsye sportive dhe jo për dëmtim. Në vend të tij u fut portieri i parë, Guglielmo Vicario, i detyruar të hynte urgjentisht në lojë me skuadrën në krizë.
Megjithatë, as me Vicario në portë Tottenham nuk arriti ta ndalë rrëshqitjen, pasi ekipi pësoi edhe golin e katërt me italianin mes shtyllave.
