Arsenali ka marrë një tjetër lajm shqetësues sa i përket gjendjes së lojtarëve, pasi Riccardo Calafiori dhe Leandro Trossard nuk arritën ta mbyllnin ndeshjen e FA Cup ndaj Mansfield Town.
Mbrojtësi italian Calafiori u detyrua të lërë fushën para kohe në sfidën e raundit të pestë, që Arsenali e fitoi me rezultatin 2-1. Megjithatë, suksesi i “Topçinjve” u zbeh nga problemet fizike të dy futbollistëve.
Calafiori ndjeu shqetësime në pjesën e pasme të kofshës dhe u zëvendësua më pak se 15 minuta para fundit të ndeshjes. Trajneri Mikel Arteta sqaroi se lojtari nuk mundi të vazhdonte për shkak të ndjesive të pakëndshme.
Sipas teknikut spanjoll, të dy lojtarët patën probleme të lehta dhe nuk ndiheshin mirë për të qëndruar më gjatë në fushë. Arteta theksoi se një situatë e tillë ishte parashikuar, sidomos duke pasur parasysh kushtet e ndeshjes, ndaj stafi vendosi t’i zëvendësonte.
Gjendja e Calafiorit shihet me shqetësim edhe nga kombëtarja e Italisë. Skuadra e drejtuar nga Gennaro Gattuso po përgatitet për gjysmëfinalen e “play-off”-it të kualifikueseve të Kupës së Botës ndaj Irlandës së Veriut, e cila do të luhet më 26 mars.
