Arsenal humbi 0-2 ndaj Newcastle në “Emirates Stadium” në gjysmëfinalen e parë të Carabao Cup. Golat për miqtë u shënuan nga i zakonshmi Isak në minutën e 37′ dhe në fillim të pjesës së dytë dyfishoi shifrat Gordon.
Një perfomancë e dobët e djemve të Artetës që goditën shtyllën në një rast me Martinellin, po ashtu Saliba dhe Havertz patën dy raste të mira për të shënuar, por nuk u konkretizuan dot.
Në përfundim të ndeshjes, në konferencën për shtyp, Mikel Arteta surprizoi jo pak duke ia vënë fajin topit për humbjen e ekipit të tij. Sipas Artetës, topi me të cilin luhet në ndeshjet e Carabao Cup është i “nderlikuar”, gjë që mund të ketë ndikuar në finalizimin e dobët të aksioneve të Arsenal.
“Është thjesht ndryshe. Është shumë ndryshe nga një top që luhet në Premier League, sepse ky fluturon shumë. Kur e prek, goditja është gjithashtu shumë e ndryshme, kështu që duhet të mësojmë të përshtatemi me këtë”, tha Arteta.
Topi që përdoret në ndeshjet e Carabao Cup është i prodhuar nga Puma, ndërsa ai me të cilin luhet në Premier League është i prodhuar nga Nike.
