Drejtori i Mjedisit në IKMT, Klesti Çela është shpallur në kërkim pasi dhunoi në zyrë Fatmir Metën, drejtorin e Ekzekutimit të Vendimeve në Inspektoratin Kombëtar të Mbrojtjes së Territorit.
Çela, kunati i Ergys Agasit, e ka dhunuar Metën së bashku me tre persona të tjerë.
Ngjarja dyshohet se ka ardhur pas një përplasjeje verbale të ndodhur një ditë më parë mes palëve.
Njofimi i policisë:
Specialistët për Hetimin e Krimeve të Komisariatit të Policisë Nr. 2 shpallën në kërkim shtetasin Klesti Çela, pasi dyshohet se dje, së bashku me 3 shtetas ende të paidentifikuar, ka goditur për shkak të detyrës shtetasin Meta, drejtor i Drejtorisë së Ekzekutimit të Vendimeve të IKMT-së, në ambientet e këtij institucioni.
Punohet për sqarimin e plotë të rrethanave të rastit.
Kujtojmë se, pas kësaj ngjarje drejtori i IKMT, Afrim Qendro ka shkarkuar nga detyra Klesti Çelën, drejtor i Mjedisit si dhe Ervin Bixhën, këshilltar pranë Kryeinspektorit të IKMT.
Vendimi për shkarkimet është marrë në koordinim me kreun e Inspektorateve, Dashnor Sula.
