Ambasadori i BE-së në Tiranë, Silvio Gonzato theksoi se Reforma Zgjedhore është një nga parakushtet për integrimin e vendit në Unionin evropian.
Teksa mori pjesë në tryezën e përbashkët të Komisionit të Reformës Zgjedhore, ambasadori theksoi se është e nevojshme për dialog mes palëve pasi vendi ndodhet në një moment kritik. Sipas tij, ligji për financimet e partive politike duhet të garantojë një fushë loje të barabartë për të gjithë aktorët, dhe se duhet të mbrojë edhe të vegjlit.
“Shprehëm vullnetin dhe përkushtimin tonë për të mbështetur punën tuaj të rëndësishme në shumë mënyra të mundshme. Në kontekstin aktual, fryma e dialogut për tema të tilla është thelbësore. Mirëpres mirëkuptimin midis të dy bashkëkryetarëve që reforma duhet të përmbushë pritshmëritë e qytetarëve dhe standardet ndërkombëtare.
Përmirësimi i sundimit të ligjit dhe përkushtimi i palëkundur ndaj standarteve evropiane është kyçe për Shqipërinë, përputhshmëria me piketat e ndërmjetshme dhe ndaj kemi këtë kohë apo afat e trysni për komisionin. Reforma zgjedhore është nevojë demokratike, besimi në zgjedhje është besim në demokraci. Ky besim nuk mund të ekzistojë kur burimet e financimit janë të paqarta apo mbikëqyrja është e dobët.
Financimi është parakusht për procesin e anëtarësimit në BE. Reforma zgjedhore, mbetet përparësi vendimtare në kuadër të kornizës së BE dhe lidhet ngushtë me themeloret. Reforma duhet të garantojë pluralizmin politik dhe të sigurojë fushë loje të barabartë për të gjithë aktorët.”, tha ambasadori.
Ai u ndal edhe te raporti i OSBE/ODIHR për zgjedhjet parlamentare të 11 majit, teksa theksoi përdorimin e administratës nga partia në pushtet, duke shtuar se është një pikë kyçe që do të duhet të adresohet shpejt.
“Kuadri ligjor duhet të sigurojë këtë konkurrencë të ndershme dhe të mbrojë aktorët e vegjël. Raporti i OSBE ODIHR foli për parti në pushtet që përfiton nga burimet administrative. Kjo është pikë kyçe që të trajtohet. Po kështu duhet parë edhe në një pikëprerje të rëndësishme me reformat e tjera, si ajo e administratës publike. “, theksoi ambasadori.
U ndal edhe te korrupsioni, ndërsa u shpreh se:
“Këtë vit ka një fokus, duke garantuar që Shqipëria të marrë përsipër një zbatim efektiv të strategjisë antikorrupsion, në fushat si prokurimi publik. Duhet të ketë në fuqi të gjitha garancitë e nevojshme për të siguruar që të gjitha aktorët partiakë të mos kenë kontrata të dhëna nga qeveria përmes proceseve të vakta apo të manipuluara. Kuadret ligjore të forcojnë integritetin duke forcuar mekanizma që sigurojnë rregullore efektive dhe sigurojnë mbrojtjen e financimit nga burime të dyshimta të huaja..”, theksoi ai.
