Gjykata e Posaçme kundër Korrupsionit dhe Krimit të Organizuar ka shpallur fajtor Gentjan Hoxhallin për korrupsion, pasi sipas akuzës ai ka përfituar në mënyrë të paligjshme gjatë ushtrimit të detyrës si funksionar publik.
Vendimi u dha ditën e sotme, më 23 shkurt 2026.
Fillimisht, gjykata e dënoi me 3 vite burg, por për shkak të procedurës së gjykimit të shkurtuar, dënimi iu ul në 2 vite.
Megjithatë, Hoxhalli nuk do të shkojë në burg. Gjykata vendosi pezullimin e dënimit dhe vendosjen e tij në provë për 4 vite. Gjatë kësaj kohe, ai duhet të paraqitet rregullisht pranë Shërbimit të Provës dhe të mos përfshihet në asnjë vepër tjetër penale.
Po ashtu, atij i hiqet e drejta për të ushtruar funksione publike për 5 vite.
Gjykata vendosi edhe heqjen e masës së arrestit në burg dhe urdhëroi lirimin e menjëhershëm të tij, nëse nuk mbahet për ndonjë çështje tjetër.
Dy telefona celularë dhe një automjet tip “Audi A6” do t’i kthehen Hoxhallit. Ndërsa shpenzimet e procesit do të paguhen prej tij.
