Djali i ish-presidentit Hashim Thaçi, Endrit Thaçi nuk ka qenë i pranishëm në asnjë seancë që është mbajtur në Gjykatën Speciale në Hagë, kundër babait të tij. Dhe kjo mesa duket ka qenë kërkesë e vetë Hashim Thaçit.
Gazetari Çlirimtar Morina, i cili ka ndjekur nga afër seancat e kësaj jave në Gjykatën Speciale në Hagë, ka treguar se kjo ka qenë një kërkesë e drejtpërdrejtë e vetë Thaçit, për shkak të mënyrës se si është zhvilluar procesi dhe gjuhës së përdorur nga prokuroria.
“Djali i ish-presidentit Hashim Thaçi s’ka marrë asnjëherë pjesë në gjykatore, pikërisht për shkak të gjuhës së përdorur absurde, akuzave të trilluara, të pretenduara e të argumentuara mjaft dobët, qysh i kanë quajtur edhe mbrojtja e ish-krerëve të UÇK-së nga Prokuroria e Specializuar e Hagës.
Pikërisht prej asaj gjuhe, presidenti Thaçi ka kërku prej familjarëve të tij që të mos marrin pjesë, pra bashkëshortja dhe Endriti, në asnjë seancë”, është shprehur gazetari në emisionin “Kosova Live”.
Sipas Çlirimtar Morinës, edhe gjatë seancave që janë mbajtur më parë në Hagë, presidenti Hashim Thaçi ka pasur raste që i ka hequr pajisjet përkthyese, pasi nuk ka dashur të dëgjonte akuzat e prokurorëve.
“Shpeshherë, kur flisnin prokurorët në kundërargumente apo në përgjigje, Thaçi e ndalte pajisjen dhe nuk i dëgjonte fare se çka thonin. Pra, në atë pjesën e pajisjeve teknike, edhe pse i kishte kufjet në vesh, e ndalte për të mos dëgjuar fjalën e tyre”, ka shtuar ai.
