Egli Pashollari, 31 vjeç, është vrarë me thikë ditën e sotme në Tiranë. Autori i dyshuar i ngjarjes është Gazmend Buçpapa, i cili është shpallur në kërkim nga policia.
Sipas të dhënave paraprake, Buçpapa, së bashku me një person tjetër dhe një vajzë (të dy ende të paidentifikuar), e kanë sulmuar Pashollarin sapo ai ka zbritur nga makina.
Dyshohet se shkak i ngjarjes së rëndë ka qenë një konflikt i mëparshëm, pasi viktima dyshohet se kishte ngacmuar motrën e Gazmend Buçpapës.
Si ndodhi ngjarja
Ngjarja ka ndodhur rreth orës 15:40, në rrugën “Kongresi i Lushnjes” në Tiranë.
Sapo ka dalë nga makina, 31-vjeçari është sulmuar nga tre personat. Gjatë përleshjes fizike, Gazmend Buçpapa dyshohet se e ka goditur të paktën një herë me thikë në kurriz.
Pashollarit i është dhënë ndihma e parë pranë një lokali në zonë dhe më pas është nisur me makinën e tij drejt spitalit nga disa persona të tjerë, dëshmitarë në vendngjarje. Megjithatë, ai nuk ka mundur të mbijetojë dhe ka humbur jetën gjatë rrugës për në spital.
Policia vijon punën intensive për kapjen e autorëve të dyshuar të ngjarjes.
