Bodø/Glimt dha një nga sinjalet më të forta të këtij “play-off”-i të Champions League, duke mposhtur Interin 3-1 në ndeshjen e parë dhe duke i vendosur italianët me shpinë pas murit përpara kthimit. Në Aspmyra, në kushte tipike nordike dhe në një terren ku vendasit dinë ta kthejnë çdo ndeshje në betejë, norvegjezët ishin më të mprehtë, më të shpejtë dhe më të vendosur.
Interi e pa veten në disavantazh në minutën e 20-të, kur Fet finalizoi një aksion të ndërtuar shpejt, duke çarë në qendër dhe duke e ndëshkuar prapavijën zikaltër. Reagimi erdhi shpejt: Esposito barazoi në minutën e 30-të, duke e rikthyer ndeshjen në ekuilibër dhe duke i dhënë Interit idenë se mund ta “ftohte” atmosferën.
Por pjesa e dytë i përkiste totalisht Bodø/Glimt. Në minutën e 61-të, Hauge shënoi për 2-1 pas një aksioni vertikal e të pastër, ndërsa vetëm pak minuta më vonë, Høgh vulosi 3-1 (64’) dhe e ktheu mbrëmjen në festë në tribunat e Aspmyra-s. Interi mbeti pa përgjigje në momentet kur duhej të rritej, ndërsa vendasit e menaxhuan avantazhin me qetësi dhe disiplinë.
Rezultati i parë është një goditje e fortë për zikaltërit, sepse në kthim, në “San Siro”, tani nuk mjafton thjesht të fitojnë: u duhet një ndeshje perfekte dhe një përmbysje me diferencë, për të mos e mbyllur aventurën që në fazën “play-off”. Kthimi luhet të martën, më 24 shkurt, dhe presioni tani kalon i gjithi te Interi.
