Komisioni Europian (KE) ka reaguar ndaj propozimit të Partisë Socialiste për të modifikuar amendamentin e Kodit të Procedurës Penale, i cili do t’i hiqte gjykatave të drejtën për të pezulluar vendimet për kryeministrin, ministrat, Presidentin, Avokatit të Popullit dhe kreun e KLSH-së. Në një deklaratë për Top News, KE thekson rëndësinë e monitorimit të çdo nisme legjislative që lidhet me gjyqësorin në vendet kandidate, përfshirë Shqipërinë.
Sipas KE, çdo ndryshim ligjor duhet të jetë në përputhje me acquis-n e BE-së dhe standardet europiane, duke përfshirë zbatimin e reformës në drejtësi të vitit 2016, e cila është një kërkesë kyçe për procesin e integrimit të Shqipërisë në BE. Komisioni nënvizon se sundimi i ligjit, pavarësia dhe llogaridhënia e sistemit gjyqësor janë elemente thelbësore për këtë proces.
Në këtë kontekst, KE kritikon retorikën që frymëzon mosbesim ndaj pavarësisë dhe integritetit të sistemit gjyqësor dhe atij të prokurorisë, duke e cilësuar atë si joproduktive. Kjo qasje, sipas KE, ndikon negativisht në procesin e reformave dhe në besimin e publikut në sistemin gjyqësor.
Gjithashtu, KE i kujton Kuvendit të Shqipërisë përgjegjësinë për të trajtuar në mënyrë të menjëhershme kërkesat për heqjen e imunitetit të anëtarëve të tij, duke theksuar se lufta efektive kundër korrupsionit është një imperativ i rëndësishëm për përparimin e Shqipërisë drejt anëtarësimit në BE.
Reagimi i KE tregon angazhimin e ngushtë të Bashkimit Europian në ndihmën dhe monitorimin e zhvillimeve në Shqipëri, duke i dhënë rëndësi të madhe reformave në drejtësi si një përparësi strategjike për integrimin europian të vendit.
