Në 18-vjetorin e Pavarësisë së Kosovës, kryeministri Edi Rama ka zhvilluar një bisedë telefonike me ish-presidentin e Kosovës, Hashim Thaçi, i cili ndodhet në Hagë, ku po përballet me akuza për krime lufte.
Rama bëri të ditur se telefonata e urimit të 17 shkurtit nga Haga është prej vitesh emocionalisht e vështirë, por këtë herë Thaçi ishte “si asnjëherë i qetë” në zërin e tij.
“Unë e kam fituar përjetë lirinë dhe kudo të ndodhem atë nuk ma merr dot kurrë askush!”, citohet të ketë thënë Thaçi gjatë bisedës, duke e përsëritur mesazhin dy herë, në fillim dhe në fund të telefonatës.
