Prefektura e Qarkut Shkodër ka bërë të ditur se situata në territorin përreth ka ardhur në përkeqësim si pasojë e reshjeve të fundit dhe fluksit të rritur në kaskadën e Drinit. Korporata Elektroenergjike Shqiptare (KESH) ka njoftuar se pas një monitorimi të kujdesshëm, ka filluar shkarkimin e kontrolluar nga hidrocentralet Fierzë, Koman dhe Vau i Dejës.
Sipas raportimeve, nivelet e lumenjve Drin dhe Bunë si dhe të Liqenit të Shkodrës kanë shënuar rritje që nga dje. Në zonën e Obotit, uji ka përfshirë kryesisht sipërfaqe të tokave bujqësore, por deri tani nuk ka rrezik për banesat. Megjithatë, aksin rrugor që lidh fshatin me rrugën kryesore e prek një sasi uji 40-50 cm, duke e bërë kalimin të vështirë për mjetet e vogla.
Situata është mbikëqyrur nga 10 ushtarë të Forcave të Armatosura, të cilët dhe 2 mjete të kalueshmërisë së lartë janë të gatshëm për çdo emergjencë.
Në lidhje me akset rrugore malore, raportet tregojnë se aksi Bogë – Theth vazhdon të preket nga reshje bore intensive, ndërsa Qafa e Thorës është bllokuar për shkak të orteqeve. Autoritetet po punojnë me mjete për pastrimin e borës. Në aksin Hani i Hotit – Vermosh, reshjet e dendura të borës janë mbi kuotën 1000 m, ku qarkullimi po kryhet vetëm me goma dimërore dhe asistencë nga mjetet borëpastruese.
Nga bashkitë Malësi e Madhe, Vau i Dejës, Pukë dhe Fushë-Arrëz, deri tani nuk janë raportuar problematika të tjera. Strukturat e mbrojtjes civile dhe institucionet vendore janë në gatishmëri dhe vazhdojnë të monitorojnë situatën, duke garantuar një koordinim të plotë për sigurinë e qytetarëve. Kjo situatë kërkon vëmendje të vazhdueshme për të siguruar që çdo zhvillim të trajtohet në mënyrë të shpejtë dhe efikase.
