Sistemi bankar shqiptar ka arritur një rekord të ri duke rënë kreditë e këqija në 3.8%, niveli më i ulët ndonjëherë. Sipas të dhënave nga Banka e Shqipërisë, kjo është një përmirësim i vazhdueshëm në krahasim me 4.1% një vit më parë dhe 4.7% në fund të vitit 2023. Megjithatë, pas kësaj përqindjeje fshihet një realitet më kompleks. Nga gjithsej 943.5 miliardë lekë kredi, rreth 35.9 miliardë lekë janë ende problematike, që sugjeron se shumë qytetarë dhe biznese përballen me vështirësi në pagesat e detyrimeve.
Rënia e përqindjes së kredive të këqija është rezultat i përmirësimit të aftësisë paguese, por gjithashtu edhe e proceseve të ristrukturimit, fshirjes ose trasferimit të kredive problematike jashtë bilanceve. Kjo do të thotë se, ndonëse sistemi bankar duket më i pastër, nuk është domosdoshmërish treguesi i një përmirësimi të përgjithshëm në gjendjen financiare të çdo huamarrësi.
Ndërkohë, bankat kanë rritur ndjeshëm fitimet. Të ardhurat totale të sistemit bankar arritën në 97.6 miliardë lekë në fund të vitit 2025, nga 94.8 miliardë lekë një vit më parë. Kjo rritje mbështetet kryesisht në interesat e larta, në një periudhë kur kreditimi vazhdon të mbetet i kujdesshëm dhe normat e interesit shpesh nuk janë në favor të huamarrësve. Po ashtu, është rritur edhe volumi i kredive për bizneset dhe individët, si dhe numri i depozitave.
Këto shifra sugjerojnë një sistem bankar më të fortë dhe më fitimprurës, por stabiliteti i bilanceve nuk është mjaftueshëm për të siguruar që ky stabilitet të lehtësojë barrën e huamarrësve dhe të stimulojë financimin më të gjerë të ekonomisë. Ky është një moment kritik për të parë nëse përmirësimet e treguesve financiarë do të shoqërohen me një rritje të financimit për sektorët që kanë nevojë më shumë për mbështetje.
