Prodhuesi gjerman i automjeteve Mercedes-Benz ka regjistruar një rënie të ndjeshme të fitimit gjatë vitit 2025. Sipas të dhënave zyrtare, fitimi neto i koncernit ra me rreth 49 për qind, nga 10.4 miliardë euro në vitin paraprak në vetëm 5.3 miliardë euro.
Kompania theksoi se rezultatet u ndikuan nga tarifat doganore, efektet negative të kursit të këmbimit dhe konkurrenca e ashpër në tregun kinez. Megjithatë, kursimet prej mbi 3.5 miliardë euro në sektorin e makinave për pasagjerë ndihmuan në zbutjen e humbjeve.
Edhe të ardhurat pësuan rënie me 9 për qind, duke zbritur në 132.2 miliardë euro. Fitimi operativ (EBIT) u tkurr me 57 për qind, në 5.82 miliardë euro. Drejtori ekzekutiv i Mercedes-Benz, Ola Källenius, deklaroi se rezultatet janë “brenda parashikimeve”, duke theksuar se kompania po fokusohet në “efikasitet, shpejtësi dhe fleksibilitet” dhe është “gati për vitin 2026”.
Gjatë vitit 2025, koncerni shiti rreth 2.16 milionë automjete (makina dhe furgonë), prej të cilave 1.8 milionë ishin makina për pasagjerë – një rënie prej 9 për qind. Rënia më e fortë u regjistrua në Kinë, tregu më i madh i kompanisë, ku shitjet ranë me 19 për qind. Aktualisht, pothuajse një në tre automjete Mercedes shitet në këtë vend.
Kompania kishte nisur një program kursimesh që në vitin 2024, pas rënies së fitimit, të ardhurave dhe shitjeve. Sipas planit, deri në vitin 2027 kostot e prodhimit dhe kostot fikse do të ulen me 10 për qind. Gjithashtu, parashikohen kursime në materiale dhe një program vullnetar largimesh për punonjësit në sektorët jashtë prodhimit.
Mercedes synon që përmes këtyre masave të rikthejë rritjen dhe të përshpejtojë transformimin e kompanisë në vitet e ardhshme.
