Një tentativë grabitjeje ndaj një furgoni të blinduar u regjistrua paraditen e sotme në rrugën shtetërore 613, superstrada që lidh Lecen me Brindisin, në Itali. Objektiv i sulmit ishte një mjet i kompanisë së sigurisë Btv (Battistolli).
Sipas informacioneve paraprake, autorët e dyshuar kishin bllokuar rrugën duke vendosur një mjet të djegur në mes të karrexhatës, duke detyruar furgonin të ndalonte.
Menjëherë pas kësaj, ata tentuan grabitjen, por ndërhyrja e forcave të rendit çoi në një përplasje të armatosur. Fatmirësisht, nuk raportohet për persona të lënduar.
Pas dështimit të sulmit, autorët u larguan me shpejtësi, duke u ndjekur nga karabinierët në zonën e Squinzanos. Në operacion u përfshinë edhe forca shtesë, të cilat mbërritën në mbështetje të patrullave të para.
Për shkak të ndërhyrjes së shërbimeve të emergjencës dhe kryerjes së hetimeve, qarkullimi në këtë segment rrugor është përkohësisht i ndërprerë. Autoritetet kanë nisur hetimet për identifikimin dhe kapjen e autorëve, ndërsa pritet normalizimi i situatës në orët në vijim.
