Juventusi shmangu humbjen në “Allianz Stadium” falë një goli në sekondat e fundit nga Kalulu në minutën e 96-të, duke barazuar 2-2 ndaj Lazios. Pas eliminimit në Kupë, bardhezinjtë rrezikuan një tjetër goditje, por reaguan pas dy golave të pësuar dhe e mbyllën ndeshjen me një pikë që, për mënyrën si erdhi, u duk si fitore.
Lazio goditi në momentet kyçe: në fundin e pjesës së parë Pedro shënoi pas një aksioni të shpejtë dhe një devijimi që e la Di Gregorio pa shans, ndërsa në fillim të pjesës së dytë Isaksen dyfishoi me një vrapim dhe finalizim të bukur. Juve u trondit, por nisi të shtyjë përpara, duke marrë kontrollin territorial dhe duke e futur Lazion në presion.
Goli i rikthimit erdhi me McKennie-n, i cili shfrytëzoi një top në qendër dhe realizoi me kokë për 2-1, duke i dhënë jetë ndeshjes. Juventus kërkoi barazimin deri në fund, ndërsa Lazio pati raste në kundërsulm për ta mbyllur takimin, por nuk i shfrytëzoi.
Dhe ndëshkimi erdhi në shtesë: Kalulu u ngrit mbi të gjithë dhe dërgoi me kokë në rrjetë një krosim nga krahu, duke firmosur 2-2 në minutën e 96-të. Barazimi e mban Juventusin në garë dhe i jep frymëmarrje në renditje, ndërsa për Lazion mbetet peng një fitore që ishte shumë pranë.
