Manchester United po vazhdon serinë pozitive në Premier League, duke marrë fitoren e katërt radhazi. Në ndeshjen kryesore të javës së 25-të, skuadra e Michael Carrick fitoi 2-0 ndaj Tottenham, me gola nga Bryan Mbeumo dhe kapiteni Bruno Fernandes.
Menjëherë pas ndeshjes, Fernandes e lavdëroi trajnerin, duke theksuar lidhjen e tij të veçantë me klubin dhe mënyrën si e kupton filozofinë e Manchester United. Sipas portugezit, ky është një nga “sekretet” e rezultateve të fundit dhe i ndihmon lojtarët edhe në momentet më të vështira.
“Michael e di çfarë do të thotë United. Ai ka fituar gjithçka këtu dhe ajo mendësi fituese na transmetohet edhe neve,” u shpreh Fernandes.
Kapiteni kujtoi edhe periudhën kur Carrick ishte trajner i përkohshëm, duke thënë se që atëherë e shihte potencialin e tij. “I thashë herën e fundit kur ishte trajneri ynë se jam i sigurt që mund të bëhet një trajner i madh. Tani po e vërteton,” shtoi ai.
