Kanadaja ka inauguruar zyrtarisht një zyrë konsullore në Groenlandë, në një veprim simbolik që vjen në një moment tensioni gjeopolitik, pasi presidenti i Shteteve të Bashkuara, Donald Trump, kishte deklaruar më herët se SHBA duhet të pushtojë ishullin Arktik për arsye të sigurisë kombëtare.
Guvernatorja e Përgjithshme e Kanadasë, Mary Simon dhe Ministrja e Jashtme, Anita Anand, udhëtuan sot drejt Nuuk, kryeqytetit të Groenlandës, për të marrë pjesë në ceremoninë e inaugurimit të konsullatës kanadeze.
Po sot, edhe Franca ka përuruar konsullatën e saj në Groenlandë, duke shtuar praninë diplomatike në ishull. Deri më tani, vetëm Islanda dhe Shtetet e Bashkuara kishin konsullata në Nuuk, sipas BBC.
Këto lëvizje diplomatike nga Kanadaja dhe Franca konsiderohen si një shenjë e qartë e mbështetjes së vazhdueshme nga aleatët e NATO-s për Groenlandën, pas deklaratave të Trump që shkaktuan reagime të forta në Evropë dhe më gjerë. Presidenti amerikan më pas i zbuti komentet e tij, duke deklaruar se po shqyrton mundësinë e një marrëveshjeje pas bisedimeve me Danimarkën, aleatët evropianë dhe Kanadanë.
Megjithatë, autoritetet kanadeze theksojnë se hapja e konsullatës nuk është një reagim i nxituar ndaj krizës aktuale. Vendimi ishte paralajmëruar që në fillim të vitit 2024, kur Ottawa rishikoi politikën e saj të jashtme për Arktikun. Konsullata ishte planifikuar të hapej në fund të vitit 2025, por inaugurimi u shty për shkak të kushteve të pafavorshme të motit.
“Jam i befasuar që kjo nuk ndodhi më herët,” u shpreh profesori kanadez Michael Myers për BBC, duke theksuar se Iqaluit, kryeqyteti i Territoreve Veriore të Kanadasë, ndodhet vetëm një orë fluturim larg nga Nuuk. Ai shtoi se lidhjet mes inuitëve kanadezë dhe inuitëve të Groenlandës janë historikisht shumë të ngushta.
