Dymbëdhjetë persona, përfshirë dy fëmijë, humbën jetën dhe katër të tjerë u plagosën më 1 janar në Cetinje të Malit të Zi. Autori i dyshuar, Aco Martinovic, një 45-vjeçar, thuhet se ka konsumuar alkool gjatë gjithë ditës para se të përfshihej në një sherr me një tjetër individ në një restorant në Cetinje, rreth orës 17:30.
Pas përleshjes, Martinovic u largua për të marrë një armë dhe u kthye në restorant, ku filloi sulmin, duke vrarë disa prej klientëve. Më pas, ai vazhdoi të drejtohet në pesë lokacione të tjera, ku shkaktoi më shumë viktima, përfshirë të afërm të tij.
Në mesin e të vrarëve ishte pronari i restorantit dhe dy fëmijët e tij, 10 dhe 13 vjeç. Ministri i Punëve të Brendshme, Danillo Sharanovic, e lidh këtë tragjedi me marrëdhëniet problematike ndërpersonale. Ai theksoi se autori kishte qenë i dënuar me kusht në vitin 2005 për sjellje të papërshtatshme, por nuk ishte konsideruar si një kërcënim për sigurinë publike.
Në vitin 2022, pas një kontrolli, atij i ishin gjetur armë dhe eksploziv, për çka ishte dënuar me tre muaj burgim në shkallën e parë.
Kryeministri malazez, Millojko Spajiq, e cilësoi ngjarjen si një tragjedi të tmerrshme dhe paralajmëroi për rregulla më të rrepta lidhur me mbajtjen e armëve.
Qeveria e Malit të Zi shpalli tri ditë zie kombëtare, më 2, 3 dhe 4 janar, ndërsa koncertet e organizuara për Vitin e Ri në Podgoricë, Budva dhe Kotor u anuluan.
