TIRANË – Policia e Shtetit ka finalizuar me sukses operacionin policor të koduar “Blue Punisher”, si rezultat i një hetimi disajavor të kryer me metoda proaktive dhe nën drejtimin e Prokurorisë, në fushën e narkotikëve.
Si pjesë e këtij operacioni, specialistët e Sektorit për Hetimin e Narkotikëve arrestuan në flagrancë dy shtetas, E. L., 42 vjeç dhe B. L., 59 vjeç, banues në Tiranë, të afërm me njëri-tjetrin.
Gjatë ndërhyrjes në banesën e tyre, në rrugën “Ali Demi”, shërbimet e Policisë konstatuan një ambient të përshtatur për përgatitjen e tabletave të lëndës narkotike ekstazi (MDMA), me qëllim shitjen kryesisht në lokalet e natës.
Nga kontrolli në ambient u sekuestruan, në cilësinë e provës materiale, 2200 tableta me lëndë të dyshuar narkotike ekstazi (MDMA), si dhe 2 aparate celularë.
Materialet procedurale i janë referuar Prokurorisë për veprime të mëtejshme ligjore.
