Atalanta i dha një goditje të fortë Juventusit duke e mposhtur 3-0 dhe duke siguruar kualifikimin në gjysmëfinalet e Coppa Italia, ku do të përballet me fituesin e çerekfinales tjetër mes Bolognës dhe Lazios.
Ndeshja nisi me ritëm dhe me një Juventus që u përpoq të impononte veten në minutat e para, por episodi kyç i pjesës së parë e ndryshoi rrjedhën. Pas një ndërhyrjeje me dorë të Bremer në zonë, arbitri pas verifikimit në VAR akordoi penallti. Scamacca u tregua i saktë nga pika e bardhë dhe i dha avantazhin Atalantës.
Në fraksionin e dytë, Atalanta mori kontrollin, menaxhoi lojën dhe e goditi Juven në momentet vendimtare. Sulemana dyfishoi shifrat pas një aksioni të shpejtë dhe finalizimi të pastër, duke e vështirësuar edhe më shumë misionin e bardhezinjve. Më pas, Pasalic e vulosi triumfin me golin e tretë, pas rikuperimit të topit në mesfushën sulmuese dhe një goditjeje të ulët në shtyllën e largët, pa i lënë mundësi Perin.
Juventusi u përpoq të reagonte, por pa qartësi dhe pa rrezik serioz: tentativa më e dukshme erdhi nga një goditje nga distanca, e pamjaftueshme për të ndryshuar fatin e një mbrëmjeje të errët në kupë
